പുതിയ പോസ്റ്റ്

എന്റെ പുതിയ പോസ്റ്റ്

വാർഷികം

ഈ ബ്ലോഗ് പൂട്ടിയിട്ടിട്ട് വരുന്ന ആഗസ്റ്റിൽ ഒരു വർഷമാകും! എനിയ്ക്ക് മാനസികമായി ഏറെ വിഷമം ഉണ്ടാക്കിയ ചില സംഭവങ്ങൾ ഈ കഴിഞ്ഞ ഒരു വർഷത്തിനിടയിൽ ഞങ്ങളുടെ കുടുംബത്തിലുണ്ടായി.
കഴിഞ്ഞ ജൂൺ 7 ന് ഞാൻ ഒരു പോസ്റ്റിട്ടിരുന്നു. അതിലെ കമന്റിൽ പറയുന്നപോലെ “വേണു നാഗവള്ളിയും, ജലജയും” പോലെയൊന്നുമായില്ലെങ്കിലും ഞങ്ങൾക്ക് ഞങ്ങളുടെ അച്ഛനും അമ്മയും ആയാൽ മാത്രം മതിയായിരുന്നു. അങ്ങിനെയുള്ളൊരു നല്ല കുടുംബം തന്നെ ആയിരുന്നു ഞങ്ങളുടേത്. ഇങ്ങനെ പുകഴ്ത്തിയവർ തന്നെ ഞങ്ങളുടെ കുടുംബം തകർക്കാൻ കാരണമായതിൽ ഞങ്ങൾ ഞെട്ടിപ്പോകുന്നു! കാരണം ഈ കമന്റ് പറയുന്ന സമയത്തുപോലും അവർ എന്നെയും അനിയനെയും ഞങ്ങളുടെ അമ്മയെയും ചതിയ്ക്കുകയായിരുന്നു.
ഇന്നലെയും ജൂൺ 7 ആയിരുന്നു. ഇത്രയും വർഷത്തെ വാർഷികങ്ങളും ഞങ്ങളുടെ കൊച്ചു കൊച്ചു സന്തോഷങ്ങളും എല്ലാം ഒന്നോടെ അവസാനിപ്പിച്ചപ്പോൾ അവർ എന്തു നേടി എന്നെ എനിയ്ക്ക് ചോദിയ്ക്കാനുള്ളു. ചാനലുകളിൽ പേരു വരാനും, ബ്ലോഗിൽ നന്നായി കഥകൾ എഴുതാനും, ബ്ലോഗ് ഡിസൈൻ ചെയ്യാനും എന്തിനധികം മലയാളം ടൈപ്പു ചെയ്യാൻ പഠിയ്ക്കാനുമൊക്കെ പകരമായി എന്തു വൃത്തികേടിനും മുതിരുന്നവരെ എന്തു വിളിയ്ക്കണമെന്നറിയില്ല! ഇപ്പോഴവരുടെ ബ്ലോഗിലെ പല കഥകളും പേരുമാത്രമായി അവശേഷിക്കുകയും അതിനകത്ത് ഒന്നുമില്ലാതായതും എന്തുകൊണ്ട്? (ആ‍ ബ്ലോഗിൽ നിന്നും പഴയ പല പോസ്റ്റുകളും അപ്രത്യക്ഷമായതെന്തെന്ന് മറ്റാർക്കും ഒരു പക്ഷെ അറിയില്ലായിരിക്കും!) എന്തൊക്കെയായാലും ഇപ്പോഴവർ പ്രസിദ്ധിയും പേരുമുള്ള ഒരു ബ്ലോഗർ ആയതിനു പിന്നിലെ യാഥാർത്ഥ്യങ്ങൾ അവർക്ക് വിസ്മരിക്കാൻ കഴിയുമായിരിക്കും. പക്ഷെ സ്വന്തം കാര്യ സാധ്യത്തിനു വേണ്ടി മറ്റുള്ളവരെ നശിപ്പിച്ച് അവരുടെ കുടുംബത്തിന്റെ തറക്കല്ല് ഇളക്കിക്കൊണ്ട് നേടിയതൊന്നും ശാശ്വതമല്ല എന്ന് എപ്പോഴെങ്കിലും ഇങ്ങനെയുള്ളവർ മനസ്സിലാക്കട്ടെ.
ആരു ചെയ്ത തെറ്റോ ദ്രോഹമോ എന്തു തന്നെയായാലും എന്റെയും എന്റെ അനിയന്റെയും ഞങ്ങളുടെ കുടുംബത്തിന്റെയും ഭാവിയെ തച്ചുടയ്ക്കുകയും സമാധാനം നശിപ്പിക്കുകയും ചെയ്തവർക്ക് അതുവഴി ദൈവം സുഖവും സമാധാനവും കൊടുക്കുമെങ്കിൽ ആവട്ടെ!
ഞങ്ങൾ ഇന്നലെയും ആഘോഷിച്ചു. അച്ഛന്റെയും അമ്മയുടെയും ഇരുപത്തി രണ്ടാമത്തെ വിവാഹവാർഷികമല്ല ഞങ്ങളുടെ കുടുംബത്തിന്റെ “അധ:പതനത്തിന്റെ വാർഷികം”.
സ്നേഹത്തോടെ,

വീണ.

വടക്കേലെ മൂപ്പിലാൻ......!

അയ്യോ അറിഞ്ഞില്ലെ, വടക്കേലെ മൂപ്പിലാൻ വലിച്ചു വലിച്ചു മരിച്ചു!
കീറാമുട്ടിയിലെ ഒരേയൊരു മല്ലന്റെ അപ്പനാണീ വടക്കേലെ മൂപ്പിലാൻ!.
തൊണ്ണൂറ്റിയെട്ടെന്ന് ജാനുമാമി പോടീ 108 ഉം കഴിഞ്ഞെന്ന് അമ്മിണി ചേച്ചി.
ചവാനായി അവസാന ശ്വാസം വലിച്ചു വിടുമ്പോഴും കീറാമുട്ടിക്കാർ മൂപ്പിലാന്റെ പ്രായത്തെ ചൊല്ലി കടി പിടി കൂടീ.

മൂപ്പിലാനാണേ രജിസ്റ്റർ ചെയ്ത വകയിൽ 26 മക്കൾ അല്ലാതെ അൺ രജിസ്ട്രേഡായി , അപ്പുറവും ഇപ്പുറവുമൊക്കെയായി കണക്കില്ലാത്ത കുറെ സന്തതിപരമ്പരകൾ. ആണും പെണ്ണും, രണ്ടും കെട്ടതും ഒക്കെ യായി മൂപ്പിലാനു തന്നെ അറിയില്ല എത്രയാ പ്രൊഡക്ഷനെന്ന്!.

അങ്ങനെ മൂപ്പിലാൻ മരണത്തോട് വലിച്ച് മത്സരിച്ചുകൊണ്ടിരിക്കുമ്പോഴാണ് മൂപ്പിലാന്റെ
വകേലൊരു ചാർച്ഛക്കാരി തമിഴ്നാട്ടീന്നു വന്നത് . പവിഴം ചേച്ചിക്ക് പല പേരാ നാട്ടിലൊരു പേര്, മറുനാട്ടിൽ വേറേ പേര് അങ്ങിനെ പേരുകളൂടെ ഒരു നിറകുടാമാണ് ചേച്ചി. ചേച്ചി വന്നതെ മൂപ്പിലാനെ കണ്ട് അലമുറയിട്ടു. എങ്ങനെ കിടന്ന ചേട്ടനായിരുന്നേ ദേണ്ടെ കണ്ടില്ലെ വലിച്ച് വലിച്ച്.. എല്ലാരും കൂടെ ഒന്നു വായോ നാട്ടാരെ എങ്ങിനേലും ഈ മൂപ്പിലാനെ ഒന്നു സ്വർഗ്ഗത്തേയ്ക്കയക്കോ!....!.

നിലവിലുള്ള ലൈസൻസ് ഉള്ള മക്കളൊക്കെ എത്തി രാമായണവും ഭാഗവതവും ഒക്കെ മാറി മാറി വായിച്ചു. പക്ഷെ അൺ രജിസ്റ്റേഡ് മക്കൾക്ക് നേരിട്ട് വരാനൊരു മടി. എല്ലാർക്കും കീറാമുട്ടിയിലെത്തി വടക്കേലെ മൂപ്പിലാനെ കാണണം എന്നുണ്ട്. പക്ഷെ നാട്ടാരു കണ്ടാലീ ജാരസന്തതികളെ തല്ലി കൊല്ലില്ലെ?.

അവസാനം ആളെ കൂട്ടാൻ പവിഴം ചേച്ചി ഒരു ഐഡിയ പറഞ്ഞു കൊടൂത്തു
. നിങ്ങളൊക്കെ വടക്കേലെ മൂപ്പിലാന്റേ മക്കളാന്നെ?. എന്നാലൊരു കാര്യം ചെയ്യ്,
നിന്റെ പേരെ രുഗ്ഗ്മിണീ, നിന്റെ പേര് ശാന്ത, നിന്റെ പേര് പാക്കരൻ., എല്ലാരും ഓരൊ
പേരിട്ടൊ എന്നിട്ട് മൂപ്പിലാന്റെ കാൽക്കലിരുന്ന് കരഞ്ഞോളീൻ, എത്ര മക്കളൂണ്ടോ അവർക്കൊക്കെ കിട്ടും വീതം വച്ച്.. എന്നാലാഞ്ഞ് കരഞ്ഞോളീൻ.... കരച്ചിലായി, കൂട്ടക്കരച്ചിലായി, ആകെ അലമ്പായീന്നു പറഞ്ഞാൽ മതിയല്ലോ,

കീറാമുട്ടിക്കാർക്കാണേ ഇതൊരു പുതുമയും!. തമിഴ്നാട്ടിൽ മാത്രമേ മരണത്തിന് ഇങ്ങനെ
ഡാൻസും പാട്ടും കരച്ചിലും (വാടകയ്ക്കെടുത്തുള്ള കരച്ചിലുകാരുടെ അഭ്യാസം!). ദാണ്ടെ
പവിഴം ചേച്ചി വന്നതു കൊണ്ടിപ്പം കീറാമുട്ടിക്കാർക്കും കാണാൻ പറ്റീ ഈ തറ കരച്ചിൽ
പരിപാടി.

വടക്കേലെ മൂപ്പിലാൻ ദൈവത്തോട് മുട്ടിപ്പായി പ്രാ ർത്ഥിച്ചു, ദൈവമേ ഈ പ്രകടനക്കാരുടെ ഇടയീന്ന് എന്നെ അങ്ങെടുക്കണേ വേഗം, ആയ കാലത്ത് മര്യാദയ്ക്ക് നടന്നിരുന്നേൽ ഇതുപോലെ ശവങ്ങൾ ചുറ്റിനുമിരുന്ന് കീറുമായിരുന്നോ കിളവാന്ന് കീറാമുട്ടീക്കാരു ചോദിച്ചു കാണണം..

നേരം ഇരുട്ടി തുടങ്ങി .. പതം പറഞ്ഞവരും, കാറി വിളിച്ചവരും ഒക്കെ തളർന്നു മയങ്ങി, വടക്കേലെ മൂപ്പിലാൻ തന്റെ വലി അവസാനിപ്പിച്ചു അവസാ‍ന ഒറ്റ വലിയോടേ!. രാവിലെ കീറാമുട്ടിക്കാരാ വാർത്ത കേട്ടാണൂണർന്നത്...

“വടക്കേലെ മൂപ്പിലാൻ പോയി......”